અમદાવાદ શહેરના તમામ શાહુકારો માટે ઈ-કોઓપ પોર્ટલ પર માહિતી અપલોડ કરવા અને વ્યાજદરના નિયમોનું અક્ષરશઃ પાલન કરવા કડક સૂચના

તારણવાળા ધીરાણ પર વધુમાં વધુ ૧૨% અને બિન-તારણવાળા ધીરાણ પર વધુમાં વધુ ૧૫% વાર્ષિક વ્યાજદર નિયત

અમદાવાદ શહેરમાં નોંધાયેલા તમામ શાહુકારો (Money Lenders) માટે સરકારશ્રીની સૂચના મુજબ માસિક પત્રકો અને ઓડિટ રિપોર્ટ ઓનલાઈન ‘ઈ-કોઓપ પોર્ટલ’ (e-Coop Portal) પર અપલોડ કરવા ફરજિયાત બનાવવામાં આવ્યા છે. શાહુકારો દ્વારા કરવામાં આવતી ધિરાણ પ્રવૃત્તિઓ અંગેની તમામ વિગતો સમયસર અપલોડ કરવામાં નહીં આવે, તો ‘ગુજરાત નાણાં ધિરધાર અધિનિયમ-૨૦૧૧’ની કલમ-૨૧ અને નિયમો-૨૦૧૩ ના ભંગ બદલ શિક્ષાત્મક કાર્યવાહી હાથ ધરીને લાયસન્સ/રજિસ્ટ્રેશન રદ કરવા સુધીના પગલાં લેવામાં આવશે.

શાહુકારો દ્વારા વાર્ષિક ઓડિટ રિપોર્ટ સમયસર રજૂ ન કરવા સબબ તંત્ર દ્વારા કુલ ૧૦૯૬ શાહુકારોને નોટિસ પાઠવવામાં આવી છે.

*ઓડિટ સંબંધિત મહત્વની જોગવાઈઓ:*

• રૂ. ૫૦ લાખથી વધુનું વાર્ષિક ધિરાણ ધરાવતા શાહુકારો: માન્ય ચાર્ટર્ડ એકાઉન્ટન્ટ (CA) પાસે ઓડિટ કરાવવું ફરજિયાત છે.

• રૂ. ૫૦ લાખથી ઓછું વાર્ષિક ધિરાણ ધરાવતા શાહુકારો: સરકારી સ્ટેચ્યુટરી ઓડિટર પાસેથી ઓડિટ કરાવવાનું રહેશે.

*નિયત વ્યાજદર અને કાયદાકીય કાર્યવાહી:*

સરકારશ્રીના તા. ૧૩/૦૧/૨૦૨૧ ના જાહેરનામા અનુસાર રાજ્યમાં નોંધાયેલા તમામ શાહુકારો માટે વ્યાજદરની મર્યાદા નક્કી કરવામાં આવી છે:

• તારણવાળા (Secured) ધિરાણ પર: વાર્ષિક વધુમાં વધુ ૧૨% વ્યાજદર.

• બિન-તારણવાળા (Unsecured) ધિરાણ પર: વાર્ષિક વધુમાં વધુ ૧૫% વ્યાજદર.

નિયત વ્યાજદર કરતા વધુ વ્યાજ વસૂલવું કે માગણી કરવી એ ફોજદારી ગુનો બને છે. ઉપરાંત, ગેરકાયદે ચોપડી/ચીઠ્ઠી/દાગીના કે અન્ય બાબતો પર ધિરાણ કરનાર ઈસમો સામે કાયદાની કલમ-૪૦ અને ૪૨ મુજબ ગુનો દાખલ કરવામાં આવશે.

ગુજરાત નાણા ધિરધાર કરનાર બાબત અધિનિયમ 2011 અને નિયમ 2013ની જોગવાઇઓનં અક્ષરસહ પાલન કરવાનું રહેશે

અમદાવાદ શહેરના શાહુકારોના નિબંધક અને જિલ્લા રજિસ્ટ્રાર (શહેર) દ્વારા કાયદાકીય માળખામાં રહીને કામ ન કરનાર તથા ઓડિટ પ્રક્રિયા ટાળનારા શાહુકારો સામે કડક વલણ અપનાવવાની સ્પષ્ટ ચેતવણી આપવામાં આવી છે. પ્રશાસન દ્વારા આવી કોઈ પણ પ્રકારની મનમાની ચલાવી લેવામાં આવશે નહીં તેમ શાહુકારના નિબંધક અ જિલ્લા રજિસ્ટ્રાસ શહેર અમદાવાદની અખબારી યાદીમાં જણાવાયું છે