સ્પોર્ટ્સ ઑથોરિટી ઑફ ઇન્ડિયા-SAIના ગાંધીનગર સ્થિત પ્રાદેશિક કેન્દ્રના પ્રાદેશિક નિયામક તરીકે પ્રશાંત સિંહની નિમણૂક કરાઈ

ભારતીય રમત સત્તામંડળ (Sports Authority of India – SAI) દ્વારા ગાંધીનગર ખાતેના પ્રાદેશિક કેન્દ્રના નિયામક તરીકે પ્રશાંત સિંહની નિમણૂક કરવામાં આવી છે. તેઓ ગુજરાત અને રાજસ્થાનમાં SAIની પ્રાદેશિક કામગીરી અને વિવિધ યોજનાઓની સમગ્ર જવાબદારી સંભાળશે.

લખનઉ, ઉત્તર પ્રદેશના વતની પ્રશાંત સિંહને રમત પ્રશાસન ક્ષેત્રે 10 કરતાં વધુ વર્ષોનો અનુભવ છે. તેમણે રમત નીતિ અને યોજનાઓના અમલીકરણ, ખેલાડી વિકાસ, રાષ્ટ્રીય તથા આંતરરાષ્ટ્રીય રમત સ્પર્ધાઓ, સ્પોર્ટ્સ સાયન્સ અને ખેલાડી સહાય પ્રણાલીઓ, સ્પોર્ટ્સ કમ્યુનિકેશન, જનસંપર્ક અને સંસ્થાકીય વિકાસ સહિત રમત ક્ષેત્રના વિવિધ આયામોમાં મહત્વપૂર્ણ જવાબદારીઓ નિભાવી છે.

તેઓ ‘ખેલો ઇન્ડિયા’ યોજનાની શરૂઆતથી જ તેની સાથે સંકળાયેલા રહ્યા છે અને વર્ષ 2018માં યોજાયેલી પ્રથમ ખેલો ઇન્ડિયા સ્કૂલ ગેમ્સના આયોજન અને અમલીકરણમાં મહત્વપૂર્ણ ભૂમિકા ભજવી હતી. તેમણે 10થી વધુ ‘ખેલો ઇન્ડિયા ગેમ્સ’ તથા 36મી નેશનલ ગેમ્સમાં વિવિધ કાર્યક્ષેત્રોમાં કામગીરી કરી છે અને બહુવિધ રમતોની રાષ્ટ્રીય કક્ષાની સ્પર્ધાઓની તૈયારી તથા આયોજન માટે SOPs અને પ્રણાલીઓના વિકાસમાં યોગદાન આપ્યું છે.

એલિટ સ્પોર્ટ્સ ક્ષેત્રે શ્રી સિંહે ટાર્ગેટ ઓલિમ્પિક પોડિયમ સ્કીમ (TOPS) અને ઓલિમ્પિક સેલ સાથે મહત્વપૂર્ણ જવાબદારીઓ નિભાવી છે. ઓલિમ્પિક રમતોમાં વધુ મેડલની સંભાવના ધરાવતી રમતો પર ધ્યાન કેન્દ્રિત કરવા માટે Priority Olympic Disciplinesની પહેલના વિકાસમાં તેમનું યોગદાન રહ્યું છે. તેમણે એથ્લેટિક્સ, કુસ્તી, હોકી, સાઇકલિંગ, ફેન્સિંગ અને જુડો જેવી રમતો માટે Sports Development Officer તરીકે પણ કામગીરી કરી છે. આ ઉપરાંત, કોમનવેલ્થ ગેમ્સ 2022, એશિયન ગેમ્સ અને એશિયન પેરા ગેમ્સ 2023 તથા પેરિસ ઓલિમ્પિક્સ અને પેરાલિમ્પિક્સ 2024 માટે ભારતીય ખેલાડીઓ અને ટીમોની તૈયારી તથા સંકલનમાં પણ યોગદાન આપ્યું છે.

વર્ષ 2021માં Central Athlete Injury Management System (CAIMS)ની સ્થાપનામાં તેમણે મહત્ત્વની ભૂમિકા ભજવી હતી. આ પ્રણાલીનો ઉદ્દેશ એલિટ અને વિકાસશીલ ખેલાડીઓ માટે ઈજાઓની રોકથામ, નિદાન અને પુનર્વસન વ્યવસ્થાઓને મજબૂત બનાવવાનો હતો. આ કાર્યે ભારતમાં સ્પોર્ટ્સ સાયન્સ અને ખેલાડી સહાય પ્રણાલીના વ્યાપક વિકાસ તથા National Centre for Sports Science and Research (NCSSR)ના માળખાને વધુ મજબૂત બનાવવામાં યોગદાન આપ્યું છે. તેમણે ખેલો ઇન્ડિયા વિમેન્સ લીગ સહિતની પહેલો દ્વારા દેશના સ્થાનિક સ્પર્ધાત્મક રમત માળખાને મજબૂત કરવા તેમજ ‘ખેલો ઇન્ડિયા રિવેમ્પ્ડ સ્કીમ’ના વિકાસમાં પણ યોગદાન આપ્યું છે.

વર્ષ 2022થી શ્રી સિંહે SAIના મીડિયા વિભાગનું નેતૃત્વ કર્યું, જ્યાં તેઓ સંચાર, માર્કેટિંગ અને પ્રચાર-પ્રસાર માટે જવાબદાર રહ્યા. તેઓ ટોક્યો ઓલિમ્પિક્સ, કોમનવેલ્થ ગેમ્સ 2022, એશિયન ગેમ્સ અને એશિયન પેરા ગેમ્સ 2023 તથા પેરિસ ઓલિમ્પિક્સ અને પેરાલિમ્પિક્સ 2024 માટેના રાષ્ટ્રીય #Cheer4India અભિયાનની પરિકલ્પના અને અમલીકરણમાં મહત્વપૂર્ણ રીતે સંકળાયેલા રહ્યા.

તેમણે ‘Fit India Movement’ના પુનરુત્થાન અને વિસ્તરણમાં પણ મહત્વપૂર્ણ ભૂમિકા ભજવી હતી. ખાસ કરીને ‘Sundays on Cycle’ અભિયાનની શરૂઆત અને તેના વિસ્તરણમાં તેમનું મહત્વપૂર્ણ યોગદાન રહ્યું છે, જે આજે દેશવ્યાપી જનભાગીદારીની એક મોટી પહેલ તરીકે વિકસ્યું છે. તેઓ ‘Khelo Bharat Niti’ અને National Sports Governance Act 2025 સહિતની મહત્વપૂર્ણ રાષ્ટ્રીય રમત પહેલોમાં પણ સંકળાયેલા રહ્યા છે.

તેમણે મહાનિર્દેશક, SAIના Officer on Special Duty (OSD) તરીકે પણ સેવા આપી છે. તેમણે ઓલિમ્પિક સેલ સાથે મળીને 2030 કોમનવેલ્થ ગેમ્સ અને 2036 ઓલિમ્પિક ગેમ્સ માટે ભારતની દાવેદારી સંબંધિત વ્યૂહાત્મક કામગીરીમાં યોગદાન આપ્યું છે. તેઓ વર્ષ 2023માં મુંબઈ ખાતે યોજાયેલા IOC Session સાથે સંબંધિત કામગીરીમાં પણ સંકળાયેલા રહ્યા હતા.

પ્રાદેશિક નિયામક તરીકેની નિમણૂક પહેલાં પ્રશાંત સિંહ ગાંધીનગર ખાતે વરિષ્ઠ મેનેજમેન્ટની ભૂમિકામાં કાર્યરત હતા, જ્યાં તેઓ ગુજરાત અને રાજસ્થાનમાં SAI તથા યુવા બાબતો અને રમત મંત્રાલય (MYAS)ની વિવિધ યોજનાઓના અમલીકરણ અને કામગીરી માટે જવાબદાર હતા.

*ગુજરાત અને રાજસ્થાનમાં રમત વિકાસને નવી ગતિ આપવાનો લક્ષ્યાંક*

પ્રાદેશિક નિયામક તરીકે પોતાની પ્રાથમિકતાઓ અંગે પ્રશાંત સિંહે જણાવ્યું હતું કે તેમની તાત્કાલિક પ્રાથમિકતા ખેલો ઇન્ડિયા યોજનાના નવા સ્વરૂપને અસરકારક રીતે ધરાતલ પર ઉતારવાની અને ગુજરાત તથા રાજસ્થાનમાં તેના ઉદ્દેશોને મૂર્ત પરિણામોમાં પરિવર્તિત કરવાની રહેશે. બંને રાજ્યોમાં રમતના સર્વાંગી વિકાસ માટે ગ્રાસરૂટ્સથી લઈને હાઈ-પરફોર્મન્સ સ્તર સુધીની વ્યવસ્થાઓને વધુ મજબૂત કરવામાં આવશે.

તેમણે જણાવ્યું કે એક મહત્વપૂર્ણ લક્ષ્યાંક NCOE ગાંધીનગરને દેશમાં Para Sportsના વિકાસ માટેના અગ્રણી કેન્દ્ર તરીકે વિકસાવવાનો રહેશે. આ માટે પેરા ખેલાડીઓ માટે મજબૂત હાઈ-પરફોર્મન્સ ઈકોસિસ્ટમ અને વિકાસના વધુ સઘન માર્ગો તૈયાર કરવામાં આવશે.

તે જ રીતે, NCOE નારણપુરાને વિવિધ રમતો માટે National Coaching Campsના આયોજન માટે દેશના શ્રેષ્ઠ ગંતવ્યોમાંના એક તરીકે વિકસાવવાનો પ્રયાસ કરવામાં આવશે. ઉપલબ્ધ આધુનિક ઈન્ફ્રાસ્ટ્રક્ચર, તાલીમ સુવિધાઓ અને અન્ય સંસાધનોનો મહત્તમ ઉપયોગ કરીને નારણપુરાને રાષ્ટ્રીય સ્તરના કોચિંગ કેમ્પ્સ માટે પસંદગીનું કેન્દ્ર બનાવવામાં આવશે.

SAIની યોજનાઓના વિસ્તરણ અને તેમની પહોંચને વધુ વ્યાપક બનાવવાની જરૂરિયાત પર પણ તેમણે ભાર મૂક્યો. વધુ રમતવિધાઓને વિકાસ અને સ્પર્ધાત્મક ઈકોસિસ્ટમ સાથે જોડવાના પ્રયાસો કરવામાં આવશે, જેમાં Softball, Baseball તેમજ અન્ય રમતોનો પણ સમાવેશ કરવામાં આવશે. આનો ઉદ્દેશ રમત ક્ષેત્રે પ્રતિભાનો વ્યાપક આધાર તૈયાર કરવો, વધુ સ્પર્ધાત્મક તકો ઊભી કરવી અને ગ્રાસરૂટ્સથી આંતરરાષ્ટ્રીય સ્તરની સફળતા તથા પોડિયમ ફિનિશ સુધીના મજબૂત અને સ્થાયી માર્ગો તૈયાર કરવાનો રહેશે.

પ્રાદેશિક નિયામક તરીકે શ્રી સિંહ ‘Athlete-First’ અભિગમને કેન્દ્રમાં રાખીને કાર્ય કરશે. તાલીમ અને ખેલાડી વિકાસ પ્રણાલીઓને મજબૂત બનાવવી, પ્રતિભા ઓળખ અને વિકાસનો વિસ્તાર કરવો, સ્પોર્ટ્સ સાયન્સ અને ખેલાડી સહાય સેવાઓનો વ્યાપક ઉપયોગ કરવો, સંસ્થાકીય કાર્યક્ષમતા વધારવી અને વધુને વધુ પોડિયમ ફિનિશ માટે સક્ષમ રમત પરિસ્થિતિનું નિર્માણ કરવું તેમના મુખ્ય કેન્દ્રબિંદુ રહેશે.

શ્રી સિંહની નિમણૂક ગ્રાસરૂટ્સ સ્પોર્ટ્સ, એલિટ એથ્લેટ ડેવલપમેન્ટ, રમત નીતિ, મુખ્ય રમત આયોજનો, સ્પોર્ટ્સ કમ્યુનિકેશન અને રમત પ્રશાસન ક્ષેત્રે તેમના એક દાયકાથી વધુના વ્યાપક અનુભવને પ્રાદેશિક નેતૃત્વ સાથે જોડે છે. હવે તેઓ ગુજરાત અને રાજસ્થાનમાં SAIની પ્રાદેશિક કામગીરીનું નેતૃત્વ કરતા બંને રાજ્યોમાં રમત વિકાસને નવી ગતિ આપવાની દિશામાં કાર્ય કરશે.