રેલવે મંત્રી ગુજરાત મા વિવિધ રેલવે પરિયોજનાઓ અને યાત્રીઓની સુવિધાઓનું લોકાર્પણ, શિલાન્યાસ અને શુભારંભ કરાવશે

ચાર ગતિશક્તિ કાર્ગો ટર્મિનલનું રાષ્ટ્રને સમર્પણ, લિંચ ગતિશક્તિ કાર્ગો ટર્મિનલનો શિલાન્યાસ તથા ગોપાલપુર રેલવે સ્ટેશનનું ઉદઘાટન

અંજાર સ્ટેશન પર ભુજ-શાલીમાર એક્સપ્રેસના સ્ટોપેજનો શુભારંભ

ગુજરાતમાં રેલવેના માળખાકીય માળખા, માલસામાન પરિવહન સુવિધાઓ અને યાત્રીઓની કનેક્ટિવિટીને વધુ મજબૂત કરવાની દિશામાં એક મહત્વપૂર્ણ પહેલ હેઠળ માનનીય રેલવે, માહિતી અને પ્રસારણ તથા ઇલેક્ટ્રોનિક્સ અને ઇન્ફર્મેશન ટેકનોલોજી મંત્રી શ્રી અશ્વિની વૈષ્ણવ દ્વારા 15 સપ્ટેમ્બર 2026 (મંગળવાર) ના રોજ વિડિયો કોન્ફરન્સિંગ મારફતે ગુજરાતમાં વિવિધ મહત્વપૂર્ણ રેલવે પરિયોજનાઓ અને યાત્રીઓની સુવિધાઓનું લોકાર્પણ, શિલાન્યાસ, ઉદઘાટન અને શુભારંભ કરવામાં આવશે.

આ પ્રસંગે માનનીય રેલવે મંત્રીજી દ્વારા શિવલખા, ભીમાસર, દેવલિયા અને ચંડીસર ખાતે આવેલા ચાર ગતિશક્તિ કાર્ગો ટર્મિનલ (GCT) રાષ્ટ્રને સમર્પિત કરવામાં આવશે. આ સાથે લિંચ ગતિશક્તિ કાર્ગો ટર્મિનલ (GCT) નો શિલાન્યાસ કરવામાં આવશે, ગોપાલપુર રેલવે સ્ટેશનનું ઉદઘાટન કરવામાં આવશે અને અંજાર સ્ટેશન પર ભુજ-શાલીમાર એક્સપ્રેસના સ્ટોપેજનો શુભારંભ કરવામાં આવશે.

ઉપરોક્ત સ્થળો પર આયોજિત કાર્યક્રમોમાં સંબંધિત વિસ્તારના માનનીય રાજ્ય મંત્રી, માનનીય સાંસદ (લોકસભા), માનનીય સાંસદ (રાજ્યસભા), માનનીય ધારાસભ્ય અને અન્ય જનપ્રતિનિધિઓની ગૌરવપૂર્ણ ઉપસ્થિતિ રહેશે.

આ તમામ પરિયોજનાઓ અને યાત્રીઓની સુવિધાઓથી ગુજરાતમાં માલસામાનના પરિવહન, વેપારી પ્રવૃત્તિઓ, લોજિસ્ટિક્સ સુવિધાઓ અને યાત્રી રેલવે કનેક્ટિવિટીને વધુ ઝડપ અને મજબૂતી મળશે.

કાર્યક્રમોની વિગત નીચે મુજબ છે:

1. ગોપાલપુર રેલવે સ્ટેશનનું ઉદઘાટન઼

માનનીય રેલવે મંત્રીજી દ્વારા ગોપાલપુર રેલવે સ્ટેશનનું ઉદઘાટન કરવામાં આવશે. સ્ટેશનના વિકાસથી વિસ્તારમાં રેલવે સંપર્ક અને યાત્રીઓની સુવિધાઓ મજબૂત થશે તથા આસપાસના યાત્રીઓ માટે રેલવે પરિવહનની પહોંચ વધુ ઉત્તમ થશે.

નવા ગોપાલપુર સ્ટેશનના નિર્માણથી અમદાવાદ અને ભુજ તરફથી આવતી-જતી ટ્રેનો માટે ગાંધીધામ ખાતે એન્જિન રિવર્સલની જરૂર રહેશે નહીં, જેનાથી પરિચાલન સમયની બચત થશે. સ્ટેશનનો વિકાસ વિસ્તારની પરિવહન જરૂરિયાતોને પૂરી કરવા અને ભવિષ્યમાં વધતી જતી યાત્રીઓની માંગ અનુસાર રેલવે માળખાને મજબૂત કરવાની દિશામાં એક મહત્વપૂર્ણ પગલું છે.

2. ચાર ગતિશક્તિ કાર્ગો ટર્મિનલ (GCT) રાષ્ટ્રને સમર્પિત

ગુજરાતમાં ચાર ગતિશક્તિ કાર્ગો ટર્મિનલ (GCT) રાષ્ટ્રને સમર્પિત કરવામાં આવશે. આ ટર્મિનલ આધુનિક માલસામાન વ્યવસ્થાપન અને લોજિસ્ટિક્સ સુવિધાઓને પ્રોત્સાહન આપવાની સાથે રેલવે-આધારિત માલ પરિવહનને ગતિ આપશે.

(i) ભીમાસર ગતિશક્તિ કાર્ગો ટર્મિનલ:

ભીમાસર ખાતે સ્થિત AFGB ગતિશક્તિ કાર્ગો ટર્મિનલનો વિકાસ Arya Freight Terminal Pvt. Ltd. દ્વારા કરવામાં આવ્યો છે. આ પરિયોજનામાં લગભગ રૂ.75 કરોડનું કુલ રોકાણ છે, જેમાં રેલવેના પરિયોજના ઘટક તરીકે આશરે રૂ.24.21 કરોડ સામેલ છે. લગભગ 52 એકર વિસ્તારમાં વિકસાવવામાં આવેલ આ ટર્મિનલ ગાંધીધામ-સામાખ્યાળી સેક્શન પર આવેલું છે અને કન્ટેનર તથા સામાન્ય માલસામાનના હેન્ડલિંગ માટે વિકસાવવામાં આવી રહ્યું છે. ટર્મિનલની અંદાજિત ક્ષમતા દર મહિને આશરે 60 આઉટવર્ડ અને 60 ઇનવર્ડ રેકની છે. આ પરિયોજનાથી લગભગ 1,000 લોકો માટે રોજગારીની તકો ઊભી થશે.

(ii) દેવલિયા ગતિશક્તિ કાર્ગો ટર્મિનલ:

દેવલિયા ખાતે સ્થિત WCGD ગતિશક્તિ કાર્ગો ટર્મિનલનો વિકાસ Western Carriers (India) Ltd. દ્વારા કરવામાં આવ્યો છે. પરિયોજનામાં લગભગ રૂ.65 કરોડનું કુલ રોકાણ અને રેલવેના પરિયોજના ઘટક તરીકે આશરે રૂ.16.28 કરોડનો સમાવેશ થાય છે. લગભગ 41 એકર વિસ્તારમાં વિકસાવવામાં આવેલ આ ટર્મિનલ સામાખ્યાળી-ધ્રાંગધ્રા સેક્શન પર આવેલું છે. અહીં મુખ્યત્વે કન્ટેનર અને સામાન્ય માલસામાનનું હેન્ડલિંગ કરવામાં આવશે. આ પરિયોજનાથી લગભગ 1,000 લોકો માટે રોજગારીની તકો ઊભી થશે.

(iii) ચંડીસર ગતિશક્તિ કાર્ગો ટર્મિનલ:

ચંડીસર ખાતે આવેલ ATGC ગતિશક્તિ કાર્ગો ટર્મિનલનો વિકાસ Emirates Terminals Pvt. Ltd. દ્વારા કરવામાં આવ્યો છે. આ પરિયોજનામાં આશરે રૂ.75 કરોડનું કુલ રોકાણ છે, જેમાં રેલવેના પરિયોજના ઘટક તરીકે આશરે રૂ.14 કરોડનો સમાવેશ થાય છે. આશરે 23 એકર વિસ્તારમાં આવેલું આ ટર્મિનલ પાલનપુર-સામાખ્યાળી સેક્શન પર છે અને મુખ્યત્વે કન્ટેનર ટ્રાફિક માટે વિકસાવવામાં આવ્યું છે. અહીંની અંદાજિત ક્ષમતા દર મહિને આશરે 10 આઉટવર્ડ અને 10 ઇનવર્ડ રેકની છે. આ પરિયોજનાથી આશરે 400-500 લોકો માટે રોજગારીની તકો ઊભી થવાની શક્યતા છે.

(iv) શિવલખા ગતિશક્તિ કાર્ગો ટર્મિનલ

શિવલખા ખાતે આવેલ KEGS ગતિશક્તિ કાર્ગો ટર્મિનલનો વિકાસ KMT Engg. Pvt. Ltd. દ્વારા કરવામાં આવી રહ્યો છે. પરિયોજનાનો પ્રસ્તાવિત કુલ ખર્ચ આશરે રૂ.200 કરોડ છે, જ્યારે રેલવેનો પરિયોજના ખર્ચ આશરે રૂ.12.97 કરોડ છે. આશરે 150 એકર વિસ્તારમાં વિકસાવવામાં આવેલ આ ટર્મિનલ સામાખ્યાળી-પાલનપુર સેક્શન પર આવેલું છે. અહીં રેલવે વેગન ઉત્પાદનની સાથે-સાથે કન્ટેનર ટ્રાફિકની સુવિધા વિકસાવવામાં આવશે. નવા ઉત્પાદિત રેલવે વેગનના દર મહિને આશરે 2-3 રેકની આઉટવર્ડ મુવમેન્ટ અને દર મહિને આશરે 10 કન્ટેનર રેક હેન્ડલ થવાની શક્યતા છે. આ પરિયોજનાથી આશરે 2,000-2,500 લોકો માટે રોજગારીની તકો ઊભી થશે.

(v) લિંચ ગતિશક્તિ કાર્ગો ટર્મિનલનો શિલાન્યાસ

કાર્યક્રમ દરમિયાન લિંચ ખાતે ગતિશક્તિ કાર્ગો ટર્મિનલ (GCT) નો શિલાન્યાસ પણ કરવામાં આવશે. આ ટર્મિનલના વિકાસથી વિસ્તારમાં માલસામાનના હેન્ડલિંગની ક્ષમતા વધશે અને ઉદ્યોગો તથા વ્યવસાયો માટે વધુ સારી લોજિસ્ટિક્સ સુવિધાઓ ઉપલબ્ધ થશે.

આ ગતિશક્તિ કાર્ગો ટર્મિનલ પરિયોજનાઓ દ્વારા આધુનિક માલ પરિવહન અને લોજિસ્ટિક્સ સુવિધાઓનો વિસ્તાર થશે, જેનાથી ઉદ્યોગો અને વ્યવસાયોને રેલવે દ્વારા માલ પરિવહનના વધુ અસરકારક વિકલ્પો ઉપલબ્ધ થશે. સાથે જ, ખાનગી ક્ષેત્રની ભાગીદારીથી વિસ્તારમાં માલ પરિવહન માટે વધારાનું માળખાકીય માળખું વિકસિત થશે અને રેલવે-આધારિત લોજિસ્ટિક્સને પ્રોત્સાહન મળશે.

3. અંજાર સ્ટેશન પર ભુજ-શાલીમાર એક્સપ્રેસનું સ્ટોપેજ

માનનીય રેલવે મંત્રીજી દ્વારા ટ્રેન નંબર 22829/22830 ભુજ-શાલીમાર એક્સપ્રેસના અંજાર સ્ટેશન પર સ્ટોપેજનો શુભારંભ કરવામાં આવશે. આ સ્ટોપેજ અંજાર અને આસપાસના વિસ્તારોના યાત્રીઓ માટે એક મહત્વપૂર્ણ અને લાંબા સમયથી અપેક્ષિત રેલવે સુવિધા છે.

આ સ્ટોપેજથી યાત્રીઓને ભુજ-શાલીમાર એક્સપ્રેસ દ્વારા દેશના મુખ્ય શહેરો અને મહત્વપૂર્ણ સ્થળો સુધી સીધી અને અનુકૂળ યાત્રાનો લાભ મળશે. અંજારથી ટ્રેન પકડવા માટે યાત્રીઓએ અન્ય સ્ટેશનો સુધી જવાની જરૂરિયાત ઘટી જશે, જેનાથી સમય અને યાત્રાના વધારાના ખર્ચની બચત થશે.

આ સુવિધા ખાસ કરીને વેપારીઓ, નોકરીયાત યાત્રીઓ, વિદ્યાર્થીઓ, પ્રવાસીઓ અને લાંબા અંતરની યાત્રા કરતા યાત્રીઓ માટે ઉપયોગી થશે. આનાથી અંજારની પ્રાદેશિક અને આંતરરાજ્ય રેલવે કનેક્ટિવિટી વધુ મજબૂત થશે અને સ્થાનિક વેપાર તથા આર્થિક પ્રવૃત્તિઓને પણ ગતિ મળવાની શક્યતા છે.

ગુજરાતમાં આ રેલવે પરિયોજનાઓ અને યાત્રીઓની સુવિધાઓ દ્વારા માલ પરિવહનની ક્ષમતામાં વધારો, આધુનિક લોજિસ્ટિક્સ માળખાનો વિકાસ, ઉદ્યોગો અને વેપારને વધુ સારી રેલવે કનેક્ટિવિટી, રોજગારીની તકોનું સર્જન અને યાત્રીઓ માટે વધુ અનુકૂળ રેલવે સેવાઓ ઉપલબ્ધ થશે.