ગાંધીનગર જિલ્લા કલેક્ટરશ્રી રવિન્દ્ર ખતાલેના અધ્યક્ષસ્થાને ‘સેવા સંકલ્પ અભિયાન’ અંતર્ગત આયોજન બેઠક યોજાઇ

​

​‘સેવા સંકલ્પ અભિયાન’ને સમગ્ર ગાંધીનગર જિલ્લામાં સફળ અને પરિણામલક્ષી બનાવવાના ઉદ્દેશ્ય સાથે ગાંધીનગર જિલ્લા કલેક્ટર શ્રી રવિન્દ્ર ખતાલેના અધ્યક્ષસ્થાને એક ઉચ્ચસ્તરીય આયોજન બેઠક યોજાઈ હતી. આ બેઠકમાં જિલ્લાના વરિષ્ઠ અધિકારીઓ, પક્ષના હોદ્દેદારો તથા વિવિધ સામાજિક સંસ્થાઓના પ્રમુખશ્રીઓએ ઉપસ્થિત રહી અભિયાનને જન-જન સુધી પહોંચાડવાનો દ્રઢ સંકલ્પ વ્યક્ત કર્યો હતો.

​બેઠક દરમિયાન કલેક્ટર શ્રી રવિન્દ્ર ખતાલેએ ગાંધીનગર જિલ્લાના તમામ તાલુકાઓ મુજબ અભિયાન હેઠળ યોજાનાર વિવિધ સેવાકીય કાર્યક્રમોની ઝીણવટભરી સમીક્ષા કરી હતી. તેમણે પ્રજાલક્ષી કાર્યો અને સરકારી યોજનાઓના લાભો નાગરિકો સુધી ઝડપથી પહોંચે તે માટે સુચારુ આયોજન કરવા અને તમામ વિભાગો વચ્ચે પરસ્પર સંકલન જાળવવા કડક સૂચનાઓ આપી હતી.

આ સમીક્ષા બેઠકમાં આવતીકાલે યોજાનાર વિશેષ ‘આશીર્વાદનો દિવડો’ કાર્યક્રમની પૂર્વતૈયારીઓ પર ખાસ ભાર મૂકવામાં આવ્યો હતો. કલેક્ટરશ્રીએ કાર્યક્રમ સ્થળની વ્યવસ્થા, નાગરિકોની સુવિધા અને તમામ પ્રોટોકોલના અમલીકરણ અંગે સંબંધિત અધિકારીઓ સાથે વિસ્તૃત ચર્ચા કરી આયોજનને અંતિમ ઓપ આપ્યો હતો.

​આ આયોજન બેઠકમાં ગાંધીનગરના જિલ્લા વિકાસ અધિકારી શ્રી દિગંત બ્રહ્મભટ્ટ, એડિશનલ કલેક્ટર શ્રી અમિત પરમાર, જિલ્લા ગ્રામ વિકાસ એજન્સીના ડાયરેક્ટર શ્રીમતી નીલોફર શેખ સહિત જિલ્લા પ્રશાસનના તમામ ઉચ્ચ અધિકારીશ્રીઓ અને વિવિધ સંગઠનોના પ્રતિનિધિઓ મોટી સંખ્યામાં ઉપસ્થિત રહ્યા હતા.