વિશ્વ હડકવા દિવસ નિમિત્તે અમદાવાદ ગ્રામ્ય આરોગ્ય વિભાગની અપીલ

વિશ્વ હડકવા દિવસ નિમિત્તે અમદાવાદ ગ્રામ્ય આરોગ્ય વિભાગ દ્વારા જિલ્લાના નાગરિકોને હડકવા રોગ અંગે જાગૃત અને સાવચેત રહેવા અપીલ કરવામાં આવી છે.

અમદાવાદ ગ્રામ્ય આરોગ્ય વિભાગના મુખ્ય જિલ્લા આરોગ્ય અધિકારી ડો. રજનીકાંત કાપડીયાએ નાગરિકોને અપીલ કરતા જણાવ્યું છે કે, કૂતરા કે અન્ય પ્રાણીના કરડવાના બનાવને સામાન્ય ન ગણવો અને તાત્કાલિક યોગ્ય સારવાર લેવી જરૂરી છે.

જિલ્લા રોગચાળા નિયંત્રણ અધિકારી ડો. ચિંતન દેસાઈના જણાવ્યા મુજબ હડકવા એક ગંભીર અને જીવલેણ વાયરલ રોગ છે. જોકે, પ્રાણીના કરડ્યા બાદ સમયસર યોગ્ય સારવાર, રસીકરણ અને તબીબી માર્ગદર્શન લેવામાં આવે તો હડકવાથી બચી શકાય છે.

ખાસ કરીને કૂતરા કે અન્ય પ્રાણી કરડે, ખંજવાળે અથવા પ્રાણીની લાળ ઘા પર લાગે તો તેને અવગણવું નહીં. ઘા નાનો હોય કે મોટો, તાત્કાલિક સાવચેતી રાખવી જરૂરી છે.

પ્રાણીના સંપર્કમાં આવ્યા બાદ સૌપ્રથમ ઘાને વહેતા પાણી અને સાબુથી સારી રીતે ધોઈ નાખવો. ત્યારબાદ શક્ય તેટલી વહેલી તકે નજીકના આરોગ્ય કેન્દ્ર અથવા સરકારી હોસ્પિટલનો સંપર્ક કરી તબીબી સલાહ મુજબ જરૂરી સારવાર અને રસીકરણ કરાવવું.

આરોગ્ય વિભાગે નાગરિકોને ખાસ અપીલ કરી છે કે, પ્રાણી કરડે ત્યારે ગભરાશો નહીં, પરંતુ સારવારમાં કોઈપણ પ્રકારનો વિલંબ પણ ન કરો. સમયસર લેવામાં આવેલી યોગ્ય સારવાર હડકવાથી બચાવમાં અત્યંત મહત્વપૂર્ણ સાબિત થઈ શકે છે.

આ વિશ્વ હડકવા દિવસનો સંદેશ છે —

“સમયસર સારવાર, હડકવાથી સુરક્ષા.”